ليش يكون عندنا هوايات؟

الهوايات لها فوائد كثيرة، زي مثلًا انك تفصل عن العالم، تقلل التوتر، تصنع لك محيط وصداقات جديدة.. واشياء كثير كمان ممكن نكون سمعناها او تعودنا نسمعها، بس بعيدًا عن الكلام المنمق ليش ضروري الواحد يكون عنده هواية؟

من وجهة نظر مجرب، قبل ستة سنوات كنت اعتبر نفسي بدون هواية وما عمري فكرت في اهمية انو الواحد يكون عنده هواية، يوم من الايام وانا في احد النوادي شفت بنات يلعبون كورة وبدأت العب معاهم.. ستة سنوات من هذاك اليوم الكورة اصبحت جزء كبير من حياتي،، انتظر وقت التمرين بفارغ الصبر،، لمن اكون مليانة توتر ومشاعر سيئة واروح العب كورة ارجع بروح جميييلة. اسأل اي احد تعرف عنده هواية،، واسأله ايش تحس بعد ما تسوي النشاط الي تحبه،، راح يكون جوابه الشعور الي احسه شعور ما ينوصف،، الهواية تربت على روحك المليانة من الحياة،، وتضيف لحياتك الوان ما كنت تشوفها.

اذا كنت شخص ما تعرف ايش هيا هوايتك حاول تروح تجرب العب تنس يوم،، احضر كلاس يوقا،، روح البحر يوم ويوم روح هايكنق،، جيب لوحة من المكتبة وارسم صدقني مهما طولت في المحاولات انك تلاقي الشي الي تحبه راح يجي اليوم وتلاقي روحك في هواية او اكثر 😉

وما تدري يمكن هوايتك يوم من الايام تصير هيا مصدر دخلك…